Ginpaidalum sang Regional Disaster Risk Reduction and Management Council (RDRRMC) 6 Operations Center ang Western Visayas sa Blue Alert Status agud mapabaskog ang pagmonitor kag pagpanghanda sa posible nga epekto sang El Niño.
Sa interview sang Bombo Radyo kay Mr. Raul Fernandez, Regional Director sang Office of Civil Defense (OCD) Region VI, iya ginpahayag nga ang Blue Alert Status nagakahulugan sang kahandaan agud mas mapadasig ang pagresponde sa tion sang emerhensya.
Suno kay Fernandez, ginpabakod pa ang pagmonitor sa sitwasyon sa rehiyon agud masiguro nga handa ang mga nagakaigo nga ahensya sa pagresponde sa posible nga emerhensya.
Samtang, nagpatigayon man ang ahensya sang Pre-Disaster Risk Assessment nga nagatutok sa sektor sang agrikultura agud mahibaluan ang posible nga epekto sang El Niño sa mga mangunguma kag sa ila pangabuhian.
