ROXAS CITY – Luyag sang Western Visayas Regional Task Force on COVID-19 (WVRTF) nga ipabilin sa idalom sang community quarantine ang Region 6 sa pihak sang desisyon sang national interagency task force on the management of emerging infectious diseases nga dulaon na ang ginapatuman nga Enhanced Community Quarantine (ECQ) kag General Community Quarantine (GCQ) sa rehiyon.
Ini matapos nga na-classify ang Western Visayas bilang low risk area para sa COVID-19.
Suno kay WVRTF spokesperson Atty. Roy Villa, mas maayo nga mapabilin ang GCQ sa rehiyon sa baylo nga dalayon nga i-lift ukon dulaon ang ginapatuman nga community quarantine.
Ginklaro sini nga indi pa dalayon nga magbalik sa normal ang sitwasyon sa rehiyon matapos ang Mayo 15 kag magapakig-angut pa sila sa mga local government units (LGU’s) para sa igapatuman nga guidelines.
Suno diri magapadayon ang WVRTF sa ila nga mga lihok apisar nga yara na sa low-risk GCQ ang rehiyon tubtob sa dalayon nga matapna ang virus kag magbalik sa normal ang sitwasyon.
Mahibaluan nga base sa COVID-19 Case Bulletin No. 47 sang Department of Health (DOH) Region 6, nakarekord na sang 97 kaso sang nasambit nga balatian sa rehiyon kun sa diin 39 ang naka-recover kag 10 na ang napatay.
