Ginapreparar na sang whistleblower nga si Julie Patidongan alyas Totoy ang iya sworn statement sa National Police Commission (Napolcom) may kaangtanan sa kaso sang nadula nga mga sabungero.
Suno sa iya, ini ang kasunod sang overnight finalization sang kalabanan sang iya affidavit sang iya kampo.
Suno sa iya, 90 porsyento sang mga dokumento ang kumpleto kag mas madamo pa nga testimonya gikan sa pamilya sang mga biktima ang ginapasaka sa Criminal Investigation and Detection Group (CIDG) sa Canlubang, Calamba City, Laguna. Matandaan nga pila sa mga missing nga sabungero ang gikan sa probinsya.
Angut sini, suno kay alyas Totoy, ginalauman nga makapakig-angot ini sa Philippine National Police Internal Affairs Service buwas nga adlaw.
Ang mga report nga ang pila ka mga pulis nga nadalahig sa kaso mahimo nga mangin mga testigo sang estado isa man ka welcome development para kay alyas Totoy.
Una na nga ginkumpirmar sang Napolcom nga may yara sila sang listahan sang mga pulis nga nalakip sa kaso sang missing sabungeros kasunod sang pagbuyagyag ni alyas Totoy nga pila ka mga pulis ang may kahilabtanan sa amo nga krimen.
Una na nga ginbuyagyag ni Justice Secretary Jesus Crispin Remulla nga 15 ka mga pulis ang yara sa restrictive custody bangud sang ila kahilabtanan sa kaso.
