Matapos ang apat ka tuig nga pagpanago, nag-atubang na si Julie “Totoy/Dondon” Patidongan, ang whistleblower sa kaso sang 34 ka missing nga sabungeros agud magpasaka sang reklamo batok sa 12 ka mga pulis nga gina-alegar involved sa pag-abduct kag pagpatay sa mga biktima.
Sa affidavit complaint nga ginpasaka sa Napolcom sang Lunes, Hulyo 14, ginpahayag ni Patidongan nga posible masobra 100 ang matuod nga numero sang mga missing.
Sa isa ka press conference, ginpahayag niya nga ang mga sabungero ginaalegar nga gindala sa isa ka farm malapit sa Taal Lake nga ginaalegar gin-arkilahan sang isa sa mga pulis antes ginpatay kag ang ila mga bangkay ginhaboy sa lake halin 2021 tubtob 2022.
Wala naman makapugong sang luha si Patidongan sang ginpamangkot kon ngaa subong lang siya nag-atubang.
Apisar nga wala niya gintumod kon sin-o ang nagpamahog sa iya pamilya, direkta sini nga gin-implikar ang negosyante nga si Charlie “Atong” bilang gina-alegar mastermind sang krimen, kag ginpahayag nga siya ang nagmando nga patyon ang mga manugbulang nga ginasuspetsahan nagapangdaya ukon naga-match fixing.
Hugot nga ginpanginwala ni Ang ang mga alegasyon kag nagpasaka man sang panumbungon batuk kay Patidongan nga ginalakipan sang robbery, grave threat, kag defamation.
Padayon ang pagpatigayon sang search operations sang Philippine Coast Guard sa Taal Lake, sa diin lima ka sako sang nasunog nga tul-an sang tawo kag sapat ang narekober sa idalom sang tubig.
Suno sa Napolcom, ginalauman nga makapaguwa sila sang resolusyon sa sulod sang 60 ka adlaw angut sa mga reklamo nga ginpasaka ni Patidongan.
