Ginkumpirma sang White House nga may ginakonsiderar subong nga kasugtanan nga 45 ka adlaw nga ceasefire sa Iran, apang wala pa ini gin-aprubahan ni US President Donald Trump kag ginapadayon pa sini ang gyera subong.
Suno sa report, ginduso sang US, Iran, kag isa ka grupo sang regional mediators ang kondisyon para sa posible nga 45-adlaw nga ceasefire, nga mahimo maghatag sang dalan para sa permanente nga pagtapos sang inaway.
Antes sini, nauna na nga gin-report sang US media nga may proposal ang mediators para sa 45-day ceasefire sa Middle East kag nabaton na ini sang Washington.
Suno sa White House, wala pa ma-aprubahan ni U.S. President Donald Trump ang 45-day ceasefire proposal.
Wala man nagpasugot ang Iran sa ceasefire, matapos ginpahayag ni Iranian Foreign Minister Esmaeil Baghaei nga may yara ini sang kaugalingon nga sabat sa ginapangayo sang Amerika nga “tapuson ang giyera” kag ginbalibaran ang mga ultimatum sang Estados Unidos sang America.
Ang nasambit nga proposal ang ginpalab-ot sang pila ka mga pungsod bilang kabahin sang nagapadayon nga pagtinguha nga mabuhinan ang tensyon sa tunga sang nagapadayon nga kinagamo sa rehiyon. Tinutuyo sini nga ipatuman ang temporaryo nga ceasefire samtang ginaduso ang mas malapad nga peace talks.
Matandaan nga nagtalana si Trump sang deadline para sa Iran nga magbukas sang Strait of Hormuz. Ginsiling sini nga kun indi ini matuman, mahimo nga atakehon sang Estados Unidos ang critical infrastructures sang pungsod.
