Personal nga naagyan ni World Health Organization (WHO) Director-General Tedros Adhanom Ghebreyesus ang ginhimo nga air-strike sang Israel sa Yemen.
Suno diri, samtang pasakay na sila sang eroplano nagikan sa Sanaa Airport sang ginpatigayon sang Israel ang air strike.
Mahibaluan nga duha ang ginbawian sang kabuhi kag isa ka crew sang eroplano ang napilasan.
Nag-angkon naman sang danyos ang air traffic control tower kag departure lounge.
Maswerte naman ang mga kaupdanan sini sa United Nations kag WHO kung sa diin kinahanglan pa nila nga hulaton nga makay-o ang mga nawasak sa hulugpaan agud sila makabiya sa lugar.
Matandaan nga yara sa Yemen ang WHO chief para sa negosasyon sang pagbuya sang staff sang UN kag obserbahan ang sitwasyon sang pungsod bangud sadtong Hunyo, may 13 ka mga staff members sang UN ang ginpreso sang Houthis sa Yemen matapos ang ginhimo nila nga crackdown.
