ROXAS CITY – Indi pa sa karon ma-attain sang talatapan sang Provincial Social Welfare and Development ang plano ni Governor Fredenil Castro nga ‘within the day’ makuha na sang nagapangayo sang financial assistance ang iya kinahanglanon nga kuwarta.
Sa interview sang Bombo Radyo kay Mrs. Nieva Camposano, head sang PSWDO, ginsiling sini nga tuman kadamo sang pending nga nagapangayo sang financial assistance sumugod sa pagpungko sang gobernador, kag aminado sila nga indi nila ini maproseso sa isa gid lamang ka adlaw.
Samtang, sa bahin sang 46-anyos nga Mister nga nagtuyo lumpat sa tulay sa syudad sang Roxas, nga gintudlo sini nga rason amu ang pagkadismaya sa ginproseso nga bulig sa PSWDO, ginpahayag ni Camposano nga Agosto 4 pa lamang nga batch ang ila mga nainterview kag natigayon nga maka-release.
Matandaan nga ba-se sa pahayag sang Mister, Agosto 9 ini nainterview.
Dugang pa sang pinuno sang PSWDO nga indi consistent ang pahayag sang mister, una nga rason sa iya pagpangayo amu ang inugbakal sang bulong para sa pilas sang iya bata, apang sa iya pagbalik kahapon nga adlaw para naman sa ila kuryente, nagpamahog pa ini sa mga staff nga balasulon ang mga ini kun may malain nga matabo sa iya bata.
Sa pihak sini, nagapangayo sang pag-intindi ang ila talatapan bangud limitado ang ila pondo sa karon nga tuig kag may mga nabilin pa nga nagpangayo sang bulig sa bulan sang Abril kag Mayo.
Ginatinguhaan man nila nga mapatuman ang plano sang Gobernador nga ‘within the day’ mabuligan ang mga nagakinahanglan.
