ROXAS CITY – Wala napaslawan ang First year college nga working student, bangud nabaton na sini ang P4,000 nga educational assistance nagikan sa Department of Social Welfare and Development (DSWD).
Sa interview sang Bombo Radyo kay Riza Mae Corros, estudyante sang CAPSU Bailan kag residente sang Brgy. Magubilan, banwa sang Panay, suno diri, madasig lang ang tagtaganay sang educational assistance sa sulod sang Capiz Gymnasium.
Ginapangita lang ang text message nga nabaton sini kag ang iya dokumento nga gin-upload sang ini ang nagpa-rehistro pinaagi online.
Suno pa diri, isa ini sa nagdagsa kag wala ma-releasan sang nagligad nga Sabado, Agosto 20, rason nga ginkuha ang iya pangalan kag contact number, apang sang nahibaluan sini nga kinahanglan mag-online register, gilayon ini nga nagparehistro kag kahapon gid lamang sang Biyernes ini nakabaton sang mensahe nga subong nga Agosto 27 ang iya schedule sa Villareal Stadium.
Pagagamiton sini ang kuwarta sa iya pagtuon kag ang iban igabakal sang kinahanglanon sang iya utod sa eskwelahan.
