Nag-resign sa pwesto si Borge Brende bilang President kag CEO sang World Economic Forum, pila ka semana pagkatapos nga ang organisasyon nagpatigayon sang isa ka independent review kasunod sa iya mga koneksyon kay sex offender nga si Jeffrey Epstein.
Si Brende ang nagpanguna sa forum nga nakabase sa Geneva halin sang tuig 2017 kag gin-anunsyo ang iya pagbiya pagkatapos sang pagpaguwa sang mga dokumento gikan sa US Justice Department nga nagapakita nga may tatlo siya ka business dinners upod kay Epstein kag nagbayluhanay sang mga email kag text messages upod sa iya.
Suno sa iya pahayag, ginpili sini nga mag-resign agud nga wala sang upang ang forum nga makapadayon sa importante nga hilikuton.
Nagpabutyag man ini sang iya pagpasalamat sa kolaborasyon sang iya mga kaupod, mga partners, kag constituents sa sulod sang walo ka tuig kag tunga niya nga pagpanguna.
Wala naman ginsambit ni Brende si Epstein sa iya pahayag.
Sa isa ka separado nga pahayag, ang mga co-chair sang World Economic Forum nga sanday Andre Hoffmann kag Larry Fink nagsiling nga ang independent review sang external counsel natapos na kag wala na sang bag-o nga mga isyu nga natukiban magluwas sa mga ginbuyagyag na sang una.
Matandaan nga gin-appoint sang forum si Alois Zwinggi bilang interim President kag CEO samtang ang Board of Trustees nagadumala sang transition kag pagpangita sang permanente nga magabulos.
