MANILA-Nagpaandam ang World Health Organization ukon WHO nga indi lamang kakulang sang tubig kag pagkadula sang ani ang posible nga epekto sang El Niño sa Pilipinas, kundi mahimo man ini magresulta sa sunod-sunod nga problema sa ikaayong-lawas.
Sa 2026 Global Public Health Situation Analysis sang WHO, ginlakip ang Pilipinas sa mga pungsod nga nagaatubang sang high tubtob very high risk sa pila ka El Niño-related health threats, lakip ang extreme heat, infectious diseases, cardiovascular kag iban pa nga noncommunicable diseases, malnutrition kag mental health conditions.
Lakip sa ginakabig sang WHO nga pinakamabug-at nga concern ang extreme heat, nga mahimo magresulta sa heat exhaustion kag heatstroke kag makapasamot sang sakit sa tagipusuon, baga kag kidney. Mas delikado ini para sa mga kabataan, tigulang, nagabusong kag mga may chronic illnesses.
Isa man sa ginatutukan ang dengue kag iban nga mosquito-borne diseases. Suno sa WHO, bisan pa magtuga sang drought ang El Niño, mahimo gihapon magdamo ang breeding sites sang lamok bangod mapilit ang mga panimalay nga magtipon kag magtipig sang tubig. Mahimo man maapektuhan sang mas mataas nga temperatura ang behavior sang lamok kag virus.
Ginpahayag man sang WHO nga mahimo maapektuhan sang El Niño ang suplay sang pagkaon kag tubig, nga nagadugang sang risgo sang malnutrition, ilabi na sa kabataan kag mga nagabusong ukon nagapadede. Ang kakulang sang tubig mahimo man magpabudlay sa hygiene kag sanitation kag magpataas sang risgo sang waterborne diseases.
Mahimo man maapektuhan ang mga health facility, medical supply chain kag access sa essential health services kon maglala ang epekto sang climate-related hazards. Bangod sini, ginarekomendar sang WHO ang pagpalig-on sang early-warning kag disease surveillance systems, pagpreparar sang health workers kag pag-ila temprano sa mga vulnerable nga komunidad.
Samtang, ginpahayag na sang PAGASA nga ang El Niño nga ginaatubang sang pungsod may yara sang wala pa makita nga kabaskog. Bangod sini, ginpahanumdom nga ang epekto sini indi lamang sa init kag kakulang sang tubig, kundi mahimo maglapta sa pagkaon, tubig, sakit kag sa ikaayong-lawas sang milyon-milyon nga Pilipino.
