Nakarecord ang World Health Organization sang pagtaas sang kaso nga Chikungunya disease sa bug-os nga kalibutan.
Suno sa datos, nakarecord sila sang 40 ka mga pungsod nga may yara sang pagbalik sang balatian nga chikungunya lakip na ang mga lugar nga madugay na nga wala nagreport sang kaso.
Humalin sang Enero tubtub Setyembre, nagdangat na sa 445,271 ang combined number sang suspected kag confirmed cases, kag 155 ang napatay.
Ang pagbiyahe sang mga natapikan nga mga tawo kag ang presensya sang mga lamok nga Aedes nagapataas sang risgo sang lokal nga transmisyon.
Lakip sa mga kabangdanan sang paglapta amo ang kakulang sang resistensya sang populasyon, urbanisasyon, kag pagbag-o sang klima.
Padayon naman nga nagapanawagan ang World Health Organization (WHO) sa mga pungsod nga pabaskugon ang pagbantay, pagkontrol sang lamok, kag paghanda sa sistema sang ikaayong lawas.
