Emosyonal nga ginpakigbahin ni Wowie De Guzman sa iya social media account ang iya pagpangasubo bangud sa pagtaliwan sang kaupod nga miyembro sa Universal Motion Dancers (UMD) nga si Norman Santos.
Makit-an sa account ni Wowie ang anay litrato sang grupo kag mga tion nga kaupod nila si Norman kag diri iya ginpahayag ang iya kasubo, pagpalangga, pagpangayo sang pasaylo kag gindumdum ang mga importante nga pag-ulupdan.
Ginpakigbahin man sini kung anu ka dako ang nangin epekto ni Norman sa iya kabuhi kag ginsiling nga wala niya maabot ang tanan kung indi bangud sa abyan.
Mahibaluan nga nagtaliwan si Norman Santos sadtong Lunes, Pebrero 3 sa edad nga 62-anyos matapos ang malawig nga pagpakigbato sa sakit sa bato kung sa diin kinahanglan nga mag-dialysis sa sulod sang masobra 12-tuig.
Suno sa asawa sini nga si Chato, ang tentative viewing para kay Norman pagahiwaton sumugod Pebrero 12 tubtob 16 sa St. Peter Memorial Chapel sa Tabacuhan, Olongapo City.
Ang UMD, nakilala sadtong dekada ’90 bangud sa mga orihinal nga saot.
Kalakip sa mga miyembro sini amu sanday Wowie, Norman, Gerald, Jim, James Salas, Miggy Eugenio Tanchanco, Brian Furlow, Marco McKinley, kag Gerry Oliva.
Ang pagtaliwan ni Norman ang nagbilin sang dako nga kasubo sa iya pamilya, mga abyan, kag mga fans apang ang iya legacy magapadayon pinaagi sa kontribusyon sang UMD sa industriya sang entertainment sa Pilipinas.
