Kon madamo ang mga pagkatuhay nga ginadala sang social media sa katilingban, madamo man ini sang maayo nga ginahimo sa mga tawo.
Kaangay sang natabo sa manunulat nga si Shawn Warner sa diin mas madamo ang nagbakal kag nagbasa sang iya libro matapos nga naluoy ang mga netizens sa iya bangud wala sang may nagtambong sa iya book signing event.
Ang TikToker nga si Red nagapamalaklon sa isa ka supermarket sang natalupangdan niya ang manunulat nga si Shawn Warner nga daw masubo bangud wala sang isa nga nagtambong sa pagpirma sang libro sang iya una nga nobela nga “Leigh Howard and the Ghosts of Simmons-Pierce Manor”. Bangud naluoy siya, nagbakal siya sang kopya sang libro kag ginpapirmahan ini. Sa pahanugot ni Warner, ginkuhaan ni Red sang video ang hitabo kag gin-post sa TikTok.
Sa wala ginalauman, madamo ang nakalantaw sang TikTok video ni Red kag nakalab-ot ini sa 15 million views. Ang kalabanan sa mga nagtan-aw sini nagbatyag sing kaluoy nga wala sing isa nga nagtambong sa kahiwatan sang pagpirma sang libro ni Warner kag nagpromisa nga mag-order sang iya libro sa Amazon online shopping website. Gintuman sang mga netizen ang ila saad kag sa sulod lamang sang 24 oras pagkatapos nga nag-viral ang TikTok video, si Warner nangin isa ka pinakamabakal nga manunulat kag nag-rank #1 sa Teen & Young Adult Fantasy and Mystery Books sa Amazon.
Si Warner nagpabutyag sang iya pagpasalamat kay Red kag sa mga nagbakal sang iya libro kag nagsiling nga tinguhaan niya ang iya masarangan sa pagsulat sang iya masunod nga mga nobela.
