Dismayado ang pila ka mga residente sa Barangay Mianay sa banwa sang Ivisan, Capiz nga mahimo indi na makabaton sang P5,000 nga Presidential Financial Assistance (PFA) bangud nagaguha nga nakabaton na sila sadto sang Emergency Shelter Assistance.
Suno kay Analyn Capapas, ginkakibot nila nga sang gin cross-match ang mga pangalan nga yara sa listahan sang makabaton sang PFA sa ila barangay kag sa listahan sang Department of Social Welfare and Development sa mga nakabaton sang ESA, masobra 50 sa ila ang nagaguha nga nakabaton na sang ESA.
Sa listahan sang DSWD, nakabaton na sila sang ESA rasun nga indi na sila kwalipikado nga makabaton sang PFA.
Apang ginpanindugan nanday Capapas nga wala sila makabaton sang ESA sang ginpanagtag ini sa ila munisipyo.
Daku karun nga palamangkutanon para sa ila kun sin-o ang responsable sa pagkuha sang mga tseke sang ESA nga sa ila nakapangalan nga wala man gani makalab-ot sa ila ang amo nga bulig pinansiyal.
Base man sa impormasyon nga nakalab-ot sa Bombo Radyo, indi lamang sa Barangay Mianay may natabo nga kasubong sini kundi mangin sa iban man nga mga barangay sa banwa sang Ivisan.
