Napaslawan nga aresyuhon sang South Korean police si South Korean President Yoon Suk-yeol sa iya presidential residence sa Seoul subong nga Biyernes, Enero 3, 2025.
Ini matapos ang standoff sa tunga sang arrest team kag presidential security team ni Yoon kung sa diin nagdugay sang halos 6 ka oras.
Nagtililipon man ang mga tagasuporta ni Yoon malapit sa presidential residence agud balabagan ang pag-araesto sa iya.
Suno sa Corruption Investigation Office (CIO) nga nagpanguna sa joint investigation batuk kay Yoon, wala nila naserbe ang arrest warrant matapos sila balabagan sang 200 ka mga suldado kag
presidential security personnel, base sa report nagikan sa Yonhap news agency.
Magluwas diri, masobra 10 bus kag passenger cars ang nagbalabag sa dalan padulong sa presidential residence kabangdanan nga nangin imposible nga makasulod sila sa edipisyon.
Bangud sini, suno sa isa ka imbestigador sang CIO, nagdeisyon sila nga suspendihon ang pagserbi sang arrest warrant batuk kay Yoon bangud sa safety concerns.
Ginsiling man sang opisina nga may pila ka magagmaay kag dalagko nga pagsabtanay ang natabo samtang gintinguhaan kun tani nila nga dakpon si Pres. Yoon.
Samtang, kadungan sang natabo nga standoff, nagpahayag na nga na-indict ang hepe sang presidential security service nga si Park Jong-joon nga gintalana ni Pres. Yoon kaupod ang iya deputy bangud sa obstruction of justice.
Matandaan una na nga gin-impeach sang parliament si Yoon sadtong Disyembre 14, 2024 bangud sa alegasyon sang insurrection bangud sa iya temporaryo kag napaslawan nga martial law sadtong Disyembre 3 apang suspendido lamang siya sa iya duties samtang nagaproseso pa ang ruling sang Constitutional Court nga siya ang magadesisyon kung dalayon nga mapaghalin si Yoon.
Kabangdanan nga si Yoon sa gihapon ang Pangulo sang South Korea nga nagakahulugan may proteksiyon sa gihapon ini nagikan sa presidential security.
Samtang, posible naman nga madugayan pa ang pagtuon kag pagdesisyon sa mangin masunod nga tikang matapos ang pagkapaslaw nga pag-aresto kay Yoon.
Mahimo man suno diri nga mag-request sila liwat sang panibag-o nga arrest warrant antes magpaso ang una nga warrant sa Lunes.
Kung kinahanglan, may opsiyon ang mga imbestigador nga mag-request sang extension ukon mag-isyu liwat sang warrant.
