Nag-viral online ang British YouTuber nga si Max Fosh matapos niya nga gin-peke ang iya kamatayon para lang makuha ang $50 nga refund gikan sa isa ka airline.
Suno kay Fosh, wala niya nagamit ang ginbakal niya nga plane ticket, apang suno sa patakaran sang airline, kamatayon lamang sang pasahero ang ila batunon nga rason para ma-refund ang bayad.
Bangud sini, nagpadulong si Fosh sa Seborga, Italy, agud magkuha sang “death certificate” gikan sa isa ka lokal nga opisyal. Ginpasa niya ini sa airline bilang pamatuod nga “patay” na siya.
Apang suno sa iya nga abogado, delikado ang ginhimo ni Fosh kag mahimo siya nga makasuhan sang fraud apisar nga ‘joke’ lamang ini.
Wala sa gihapon nakuha ni Fosh ang refund, apang nag-trending ang iya nga video kag nag-angkon sang madamo nga reaksiyon sa social media. Pahanumdom sang iban, importante nga basahon kag intindihon ang refund policy sang airline antes magbakal sang ticket.
