Ginsiling ni Ukraine President Volodymyr Zelensky nga isa ka ‘disinformation space’ ang nabaton nga impormasyon ni US President Donald Trump, may kaangtanan sa kinagamo sang Ukraine kag Russia.
Sa isa ka press conference nga ginhiwat sa Kyiv, Ukraine ginsiling ni Zelensky nga indi matuod ang impormasyon nga ang Ukraine ang nagsugod sa pagtuga sang gamo batuk sa Russia.
Ini matapos gin-akusahan ni Trump ang pungsod Ukraine.
Ang mga komento ni Zelensky kabahin sang pagbayluhanay sang mga akusasyon sa tunga sang Kyiv kag Washington sumugod nga nagsugod ang bug-os nga inaway halos tatlo ka tuig na ang nakaligad.
Mahibaluan nga ang mga opisyales sang US kag Russia naghiwat sang mataas nga lebel sang paghambalanay sa pagtapos sang inaway sa Ukraine sa kapital sang Saudi nga Riyadh sang Martes, isa ka pagsinapol nga wala ginlakip ang Kyiv.
Ang duha ka bahin nag-ugyon sa pagtangdo sang mga mataas nga lebel nga mga grupo sa pag-negosyar sa katapusan sang inaway kag nagsiling nga sila nagatrabaho sa pagtukod liwat sang mga diplomatiko nga mga alagyan.
Ginsiling man ni Zelensky nga sin-o man nga pungsod kinamatarong sa paghinun-anun sang mga isyu sa bilateral kaupod sa Saudi Arabia, ang kamatuoran nga ang US naghiwat sang direkta nga paghambalanay upod sa Russia.
Ang sayop nga pag-angkon nga ang Ukraine amo ang nagsugod sang inaway madugay na nga ginasulit sang Kremlin kag sang mga sumalakdag sini.
Ang inaway nagsugod sang 2014, sang ilegal nga ginsakop sang Russia ang Crimea, ang nabagatnan nga peninsula sang Ukraine, kag nagsugod sa pag-sponsor sang mga pro-Russian separatists sa sidlangan nga Ukraine.
Ang Moscow gilayon man nga naglunsar sang isa ka bug-os nga pagsalakay sa Ukraine sadtong Pebrero 2022, nga nagasalakay sa iya mas gamay nga kaingod sa gab-i, nagapadala sang mga tangke sa tabok sang dulunan, nagapamomba sa mga siudad sang Ukraine kag nagapadala sang mga espesyal nga pwersa sa Kyiv sa pagpatay kay Zelensky.
