Wala sang may nabalhag nga maritime kag drowning incidents ang Philippine Coast Guard-Capiz kadungan sang pag-obserba sang Semana Santa 2026.
Sa interview sang Bombo Radyo kay Ensign James Reuben Evangelista Jr., Deputy Commander for Administration sang Philippine Coast Guard-Capiz, iya ginpahayag nga nangin madinalag-on ang Oplan:Byaheng Ayos sang ila talatapan paagi sa hugot nga pagbantay sang tanan nga mga personnel.
Suno kay Evangelista, nag-conduct ang ila talatapan sang intensified patrolling sa mga coastal area kag beach resorts nga masami nga ginapadulungan sang mga tawo.
Nangin matawhay man ang mga pagbyahe sang tanan nga mga pasahero kag wala sang may na-rekord nga delay sa byahe sang mga barko.
Pahayag pa niya, madinalag-on man ang ila koordinasyon sa pila ka mga local government units kag partner agencies sa pagbulig bantay sa palibot sang probinsya.
Nagpasalig man ang natungdan nga magapadayon ang ila pagserbisyo sa pagpabilin sang kalinong kag katawhay sang mga baybayon sang probinsya sang Capiz.
