TAPAZ, CAPIZ- Duwa ka mga high-powered firearms ang natigayon nga narekober kasunod sang nagluntad nga engkwentro sa tunga sang mga katapo sang 12th Infantry Battalion (12IB) kag mga nabilin nga myembro sang Communist Terrorist Group (CTG) sang Sabado, takna las 5:30 sang aga, Hulyo 19, 2025, sa Barangay Apero, Tapaz, Capiz.
Sa impormasayon nga nakuha sang Bombo Radyo nagikan sa 12th Infantry Battalion, ginpahayag diri nga kasunod sang ginpalab-ot nga mga impormasyon sa ila nga talatapan may kaangtanan sa mga nabilin nga mga myembro sang rebelde, nagpatigayon ang ila nga hubon sang combat operations sa diin nga na-engkwentro nila ang kapin 10 ka mga nabilin pa nga myembro sang napuhag nga guerilla fronts sang Communist Terrorist Group – partikular ang Central Front kag Regional Sentro De Grabidad (RSDG) sang Komiteng Rehiyon-Panay (KR-Panay).
Ang 15-minutos nga engkwentro nagresulta sa pagkarekober sang isa (1) ka M16 rifle, isa (1) ka AK-47 rifle, duwa (2) ka mga magazines, nanari-sari nga mga bala, subversive documents, kag lain pa nga mga kagamitan panggiyera.
Wala naman sang may nareport nga napatay sa bahin sang mga military.
Ang madinalag-on nga Focused Military Operation (FMO) ang nangin possible pamaagi sa mga ginapalab-ot nga mga impormasyon sang mga pumuluyo kag sa padayon nga suporta sang mga taga-Tapaz sa padayon nga pagpakigbato sang 12IB sa insurhensya nga nagalayon nga dalayon na nga mapuhag kag madula ang mga nabilin pa nga mga myembro sang Communist Terrorist Group sa banwa.
Kasunod sang sini nga kadalag-an, liwat nga ginasiguro sang 12IB ang ila nga dedikasyon sa pagprotektar sa komunidad, pagpabilin sang kalinong, klag pagsuportar sa mga inisyatibo sang lokal nga gobyerno padulong sa malinong kag mainuswagon nga Tapaz.
