ROXAS CITY — Ginkumpirmar sang deputy provincial director sang Capiz Police Provincial Office nga company commander man sang Provincial Public Safety Company ang pamahog sang rebelde nga New People’s Army nga magasalakay sila sa detachment sang 1st Maneuver Platoon sang PPSC sa Barangay Dulangan, Pilar, Capiz.
Bangud sini suno kay PSUPT. Giovanni Musico, yara subong sa heightened alert ang amo nga unit sang pulisya kag ang President Roxas PNP agud hugot nga mabantayan ang nasambit nga pagsalakay.
Sa karun, masako na ang pagpatrolya sang mga katapo sang pulisya sa palibot sang ila nga detachment agud nga mamonitor ang mga hulag kag posible nga paglunsiyar sang pagpang-atake sang mga NPA.
Nagapati man si Musico nga mahimo nag-ugat ang pamahog sang mga rebelde sa natabo nga pagpangluthang sa mga mangunguma sa Barangay Culilang sa banwa sang President Roxas nga ginkamatay sang isa ka persona kag ginkasamad sang apat ka iban pa.
Suno pa sa iya nga may namonitor man sila nga paghulag sang mga rebelde nga grupo sa mga kabukiran kag barangay nga malapit sa detachment sang 1st Maneuver Platoon.
Mahibaluan nga una na nga nagpaguha sang pahayag ang Coronacion Chiva Waling-Waling Command sang NPA sa Panay nga nagakondena sa natabo nga insidente kag nagpasalig nga ila pangapinan ang mga mangunguma.
