ROXAS CITY – Kahadluk ang nabatyagan sang isa ka pamilya matapos makabaton sang tatlo ka bulak para sa patay kag kandila sa ila nga balay sa Burgos Ilawod, Barangay 5, sining syudad.
Blangko pa sa karon ang pamilya Vidal, kun sin-o ang nagpadala sang bulak nga may mensahe nga RIP Natchel kag RIP Nelson nga ginbilin sa guwa sang ila balay, apang aminado nga may pila ka mga tao nga nakaaway bangud sa indi pag-intindihanay.
Kalakip sa mga ini ang anay city legal counsel nga si Atty. Faustino Roxas nga may kaso nga ginpasaka sa ila, ang nagabaligya sang relief clothing nga malapit sa ila nga balay bangud sa ginaalegar paglapas sa sidewalk ordinance kag ang pinakaulihi amo ang natabo sa ila nga fruitstand sa diin ginwas-ag ang ila baligya nga prutas sang nagpakilala nga kostumer.
Suno kay Natchel nagbilin pa sang pamahog ang suspek sa anak nga nagabantay sa ila prutasan nga ipalab-ot sa iya ang mensahe nga patyon ini.
Nagapati si Natchel nga may kaakig sa iya ang nagpadala sang bulak, apang handa siya nga mag-atubang kun kinahanglanon.
