ROXAS CITY – Isa ang patay duha ang pilason sa pagpangbuno kag rambol sa Barangay Libas, Roxas City kagab-i.
Ginkilala ang biktima nga si Graciano Besana 27-anyos isa ka mangingisda matapos mabun-an sang nagabaligya sang sipao nga si Raymond Singular.
Suno kay Kagawad Renante Araw Araw nagsugod ang kinagamo tobtob naglab-ot sa pagbun-anay sang pamangkuton sang biktima ang suspek nga ila nasugata angut sa ginprenda nga kutsilyo sa balot nga P50, bilang bayad sa ginkaon nga siopao nga baligya sang suspek.
Apang nagpanindugan ang suspek nga indi pag=ibalik ang nasambit nga kutsilyo , kun indi pagbayaran sang biktima ang P50 nga balor sang siopao nga ginkaion ni Besana.
Sa pag-estoryahanay sang duha sa madulom nga porsyon sang karsada, hinali na lamang nga ginbuno ni Raymond ang biktima sa nawala nga bahin sang dughan.//
Sa pihak sang pilas sa dughan nahimo pa nga makadalaan sang biktima sa balay sang mag-amay nga Hermino Ogbinada Sr. kag Jr., nga anay amo sini sa sakayan pangisda para magpangayo sang bulig.
Suno naman kay Jovel Faces, kaupod sang biktima nga magadalagan pa kuntani ini matapos nakita nag ginbuno si Besana, apang wala ginalauman nga nadanlog ini kag nabatyagan na lamang sini nga ginbuno siya sa likod..
Samtang naaresto ang suspek nga nagpatay sa biktima matapos gin-ako sini sa mga nag-imbestiga nga mga pulis sa ospital nga siya ang nagbuno kay Besana.
Nahibaluan nga ang suspek ang nagdala sa ospital sa iya utod nga si Joel Singular nga ginbuno sang mag-amay nga Ogbinada matapos ginaalegar nga gintuyo sini nga bun-on ang isa ka miyembro sang pamilya Ogbinada.
Gin-aresto man sang mga pulis ang mag-amay nga Ogbinada matapos nagguwa sa imbestigasyon nga sila ang responsable sa pagbuno kay Joel.
