ROXAS CITY – Bangkay na sang nasapwan ang isa ka 25-anyos nga lalaki matapos nga gin-anod sang baha tuga sang mabaskog nga pag-ulan sa Barangay Badiangon, Pres. Roxas, Capiz.
Ginkilala ang biktima nga si Leonel Ballon sang nasambit nga lugar.
Sa ekslusibo nga interview sang Bombo Radyo Roxas sa amay sang biktima nga si Remundo Dieta 76-anyos nga takna alas 9 kagab-i magkaupod pa sila nga nagapanyapon sang iya anak sang hinali na lamang nga nagtaas kag nagbaskog ang lebel sang tubig.
Bangud diri, hinali na lamang nga gin-anod sang nagaragasa nga tubig baha ang puloy-an nila.
Suno kay Tatay Remundo nga ginhambalan pa sini ang iya anak nga mag-evacuate na apang nagpakatig-a pa ini bangud indi sini luyag nga bayaan ang ila hinuptan nga mga sapat.
Ginapahayag nga matapos nga gin-anod sang tubig baha ang ila nga balay nagbulagay na sila sang iya nga bata.
Ginpahayag pa ni Tatay Remundo nga diyutayan man ini anuron sang baha apang maswerte na lamang nga nakahawid ini sa puno sang kahoy samtang ang iya bata naman ang wala na nakaluwas matapos gin-anod sang tubig.
Nahibaluan nga subong lamang nga aga nasapwan ang bangkay sang iya bata sa kilid sang suba kun sa diin madamo na ini sang pilas sa pila ka mga porsyon sang iya lawas.
Sa karon, tuman na lamang ang kasubo nga nabatyagan ni Tatay Remundo matapos nga nadulaan ini sang balay kag pinalangga sa kabuhi.
Mahibaluan nga duha lamang sila nagakabuhi nga magkaupod sang iya nagaisahanon nga anak.
