ROXAS CITY – Patay ang isa ka indibidwal samtang pilason naman ang isa ka menor de edad sa pagbungguanay sang duha ka motorsiklo sa Barangay Santa Fe, Pilar, Capiz.
Ginkilala ang napatay nga biktima kay John Rey Campos, 28 anyos, sang Barangay San Ramon, sang nasambit man nga banwa, samtang nakaangkon naman sang magkatuhay nga kasamaran sa lawas si Rymwel Aplomina, 16 anyos, sang Barangay Casanayan, Pilar.
Base sa inisyal nga imbestigasyon, magatabok kuntani si Aplomina sa dalan sakay sa iya nga motorsiklo sang aksidente ini nga nabungguan sang motorsiklo nga ginamaneho ni Campos nga ginapahayag madasig ang pagpadalagan.
Bangud sa kabaskugon sang pagkabunggo, lunsay nagkalatumba ang duha ka motorsiklo nga nagresulta sa pagkabunggo sang ulo ni Campos sa dalan samtang nag-angkon naman sang mga pilas sa lawas ang menor de edad.
Gindala pa sa ospital si Campos apang gindeklarar ini nga dead-on-arrival sang attending physician.
Sa karon, nagapaayo naman ang menor de edad bangud sa naangkon sini nga mga kasamaran sa lawas.
