ROXAS CITY – Madasig nga ginlamon sang kalayo ang napulo tanan ka mga puloy-an, matapos ang nagluntad nga sunog sa Sitio Plaridel, Barangay Cagay, sini nga syudad.
Sa interview sang Bombo Radyo kay SFO2 Selvino Ross Jr., tagpamaba sang BFP-Roxas, ginpahayag sini nga pito sa mga balay ang totally burned, samtang tatlo diri ang partially burned.
Ginpahayag man nga nagikan ang kalayo sa panimalay ni Dexter Humamoy kag gilayon naglapta ang kalayo sa mga kaiping pa sini nga puloy-an.
Nagsugod ang sunog mga alas-10:20 sa aga kag gindeklarar nga fire out alas-11:54 man sa aga.
Sa pagpadulong sang Bombo News Team sa lugar, ginpahayag sang pila ka mga kabataan nga bangud sa ginsindihan nga posporo sang isa ka bata ang ginhalinan sang kalayo.
Apang, sandig sa inisyal nga imbestigasyon sang mga bumbero, ginasundan nila ang faulty electrical wiring bilang gintunaan sang sunog.
Ginabulubanta may kahalitan nga P825,000 ang amu nga insidente.
Gilayon man nga naghatag sang pauna nga bulig ang City Government sa mga biktima sang sunog.
Nagpasalamat man si Ross sa mga katapo sang CACAG, Ferocity, mga opisyal sa barangay, kag sa tanan nga nag-volunteer sa pagpalong sa nasambit nga sunog.
Nagapadayon ang imbestigasyon sa insidente.
