Masobra 1,000 nga pampubliko nga buluthuan ang gin-delay ang pagsugod sang klase para sa School Year 2024-2025, nga nakatalana bwas nga adlaw, Hulyo 29.
Ginpahayag sang Department of Education (DepEd) nga may kabug-usan 1,002 nga mga buluthuan sa Metro Manila, Ilocos Region, Central Luzon kag Soccsksargen Region ang indi magsugod sang klase bwas, adlaw sang lunes.
Partikular nga gintuad sang departamento nga ang mga buluthuan sa mga syudad sang Malabon, Pasig, Marikina, kag Valenzuela ang magabukas sang klase sa Agosto 5, 2024.
Samtang, duha naman ka mga buluthuan sa Navotas City, lima sa syudad sang Maynila, 13 sa San Juan City, kag 15 sa Quezon City ang magasugod man ang klase sa Agosto 5.
Una na nga ginpahayag ni President Ferdinand “Bongbong” Marcos Jr. sang tinalikdan lang nga biyernes, nga ang pagsugod sang mga klase sa Hulyo 29 ang dapat magpadayon kun mahimo, maluwas sa mga lugar nga nahalitan gid sang bagyong Carina kag Habagat.
