Padayon nga ginahibalo sang 3rd Infantry Division sang Philippine Army ang identity sang nagkalamatay nga Communist Terrorist Group (CTG) remnants sa engkwentro nga nagluntad sa Sitio Santol, Barangay Tampalon, Kabankalan City.
Sa interview sang Bombo Radyo kay Captain Jessi Jun Ebalan, Chief sang 3rd Infantry Division Public Affairs Office, iya ginpahayag nga ang mga napatay amo sanday Milky Sampini, alyas “Gorting”, Ritche Verano, alyas “Makoy” kag si Joedil Balsimo, alyas “Junjun” nga ginapahayag involve sa nagkalain-lain nga bayolente nga insidente sa Negros Island, lakip na ang pagpatay kag pagsunog.
Suno kay Ebalan, naglawig sang duha ka minuto ang engkwentro nga nagresulta sang pagkapatay sang tatlo ka miyembro sang Kometing Rehiyon Negros.
Narekober naman sa ginluntaran sang insidente ang lima ka mga matag-as nga kalibre sang armas nga ginalakipan sang isa ka R4 rifle, duha ka M16 rifles, duha ka M203 grenade launchers, isa ka granada, kag nagkalain-lain nga subersibo nga mga dokumento.
Wala naman sang may napatay ukon napilasan nga mga katapo sang Philippine Army sa nagluntad nga engkwentro.
Gin-engganyo man sang natungdan ang tanan nga nabilin nga mga katapo sang Communist Terrorist Group nga magsungka ukon magbalik sa sabak sang gobyerno agud mahatagan sang tsansa nga tadlungon ang tiko nga pagpati.
