Ginpatigayon na ang groundbreaking ceremony para sa pagtukod sang pinakauna nga Balay Silangan Recovery Facility ukon drug rehabilitation center sa Roxas City nga nahamtang sa Barangay San Jose.
Ang Balay Silangan amo ang pasilidad nga magaserbi nga rehabilitation kag recovery center para sa mga indibidwal nga nagagamit sang ilegal nga droga kag handa na nga magtalikod sa ila bisyo kag magbag-o sang ila kabuhi.
Paagi sa sini nga pasilidad, pagahatagan sang kahigayunan ang mga benepisyaryo nga makaagi sa nagakaigo nga rehabilitation program, guidance kag suporta agud mabuligan sila nga makabalik sa husto nga pagpangabuhi kag mangin produktibo nga katapo sang komunidad.
Nagpasalamat man ang lokal nga panguluhan sa pamilya Sicad bangud sa ila pagdonar sang duta nga pagatukuran sang nasambit nga pasilidad.
Nag-upod sa groundbreaking ceremony sanday Vice Mayor Teresa Almalbis, City DILG Officer Ginno Salamanca, PLt. Col. Rogelio L. Tomagtang Jr., PDEA Intelligence Agent V Jury Rocamora, BJMP JSInsp. Woody Palmejar kag JSInsp. Rowena Magallanes, kaupod ang iban pa nga katapo sang City Anti-Drug Abuse Council.
Ginatan-aw nga isa ini ka importante nga tikang sang syudad sa pagpalig-on sang ila kampanya kontra ilegal nga droga, indi lamang paagi sa pagpatuman sang layi kundi lakip na ang paghatag sang oportunidad sa mga indibidwal nga magbag-o kag makabalik sa komunidad.










