Masobra 600 ka pamilya sa Roxas City ang naggradwar na bilang benepisyaryo sang Pantawid Pamilyang Pilipino Program ukon 4Ps sang Department of Social Welfare and Development (DSWD).
Ini kasunod sang pag-abot sang mga pamilya sa punto nga nakapauswag na sang ila kahimtangan sa kabuhi kag nakatuman sa mga kinahanglanon sang programa nga nagahatag sang bulig pinansyal sa mga nagakinahanglan nga mga panimalay.
Suno sa lokal nga panguluhan, dako nga kalipay nga makita ang pag-uswag sang kapin 600 ka pamilya nga nangin kabahin sang programa kag nakahimo na nga mangin mas independente sa pangabuhi.
Nagpasalamat man ang lokal nga panguluhan sa DSWD sa padayon nga pagsuporta kag pagbulig sa mga pumuluyo, ilabi na sa mga pamilya nga nagakinahanglan sang pinansyal nga bulig agud masuportahan ang edukasyon kag kinahanglanon sang ila mga kabataan.
Paagi sa 4Ps, ginahatagan sang conditional cash assistance ang kwalipikado nga mga pamilya agud mabuligan sila sa mga kinahanglanon sa edukasyon, panglawas kag nutrisyon, nga may katuyuan nga maputol ang siklo sang kapigaduhon sa masunod nga henerasyon.











