Ginkilala kag ginpasidunggan ang Bombo Radyo Roxas sang Social Security System ukon SSS, Visayas West 2 Division, bilang isa sa mga local media partners sa ginpatigayon nga 2026 Local Media Appreciation subong nga Biyernes, Nobyembre 20, sa Shuffles Roxas, Roxas City.
Ang aktibidad nga may tema nga “Bawat Isa Protektado; Bawat Bukas Sigurado” ginpatigayon agud ipahayag ang pagpasalamat sang SSS sa mga local media organizations nga nagasuporta sa pagpalapnag sang impormasyon parte sa mga programa, serbisyo, kag benepisyo nga ginahatag sang ahensya para sa iya mga miyembro.
Kabahin sa programa ang welcome message kag expression of appreciation ni Atty. Alberto Montalbo, Senior Vice President sang SSS Visayas Operations Group.
Ginpangunahan naman ni Ms. Lovely Rose Macahilo, Branch Head sang SSS Roxas Branch, ang pagpasidungog sa mga local media partners.
Naghatag man sang mensahe si Angelo O. Blancaver, Vice President sang SSS Visayas West 2 Division.
Gintambungan ang aktibidad nanday Bombo Chris Jan Hechanova Lozada, Station Manager sang Bombo Radyo Roxas, kag Bombo Paul Aguirre, Reporter.
Dugang pa diri, gin-anunsyo man sa amo nga aktibidad nga pagabuksan sa tuig 2027 ang dugang nga mga opisina sang Social Security System sa probinsya sang Capiz, partikular sa mga banwa sang Dao kag Mambusao.
Ini ang ginapaabot nga magapalapit pa sa mga miyembro kag iban pa nga residente ang pag-access sa mga serbisyo sang SSS.
Ang pagpasidungog sa Bombo Radyo Roxas nagapakita sang padayon nga pagpasanyog sang kooperasyon sa tunga sang media kag SSS, agud mas madamo nga pumuluyo ang maabot sang importante nga impormasyon parte sa social security protection kag mga benepisyo nga mahimo nila maangkon.











