Nag-abot na sa pungsod ang 10,000 doses nga bakuna batuk sa African swine fever (ASF).
Suno kay Agriculture Asisstant Secretary Dante Palabrica, pagagamiton ang mga bakuna sa emergency inoculation sang healthy nga growers sa Red Zones agud mapunggan ang ‘resurgence’ sang virus sini.
Ini ang kabahin sa gihapon sang igapatigayon nga mas malapad nga controlled testing sang pungsod sa ASF vaccines halin sa Vietnam.
Ginpahayag ni Palabrica nga may iban nga vaccine manufacturers man gikan sa US, South Korea kag Vietnam ang naga-apply sa Food and Drug Administration (FDA) agud mangin kabahin sang igapatigayon nga controlled testing sang Bureau of Animal Industry (BAI).
Dugang pa ni Palabrica, magapatuman ang FDA sang hugot nga requirements para sa controlled testing agud masiguro nga epektibo ang pagagamiton nga bakuna kontra ASF.
Igapaidalom man suno diri sa genome sequencing ang virus agud masiguro nga indi magresulta sa mutation ang inoculation.
Sa pag-abot sang bakuna kontra ASF, ginalauman sang DA nga masuguran na subong nga semana ang pagbakuna kun sa diin pagaunahon ang Batangas.
