Luwas nga gin-evacuate sa syudad sang Van sa Turkey ang 11 ka mga Overseas Filipino Workers (OFWs) gikan sa Iran sa tunga sang nagalala nga tensyon sa Middle East.
Suno sa DFA, ginpatigayon ang pag-evacuate sang mga Pinoy pinaagi sa koordinasyon sang mga embahada sang Pilipinas sa Tehran kag Ankara, kag natalana nga magbalik ang mga ini sa Pilipinas sa masunod nga mga inadlaw.
Samtang ginpasalig man sang ahensya nga padayon ang ila pagbulig sa ginabulubanta 800 ka mga Pilipino nga nagapuyo subong sa Iran nga luyag magpauli.
Kaangot sini, nagpanugyan ang DFA sa mga Pilipino nga nagakinahanglan sang bulig nga gilayon makig-angot sa embahada pinaagi sa ila opisyal nga hotline kag social media channels.
Samtang, base sa data sang gobyerno, may kabug-usan nga 1979 ka mga Pinoy sa siyam ka mga pungsod sa Middle East ang luyag magpauli sa diin ang kalabanan ang gikan sa Kuwait nga may 633 ka OFWs.
Apang nagapabilin nga sirado ang airspace sa pila ka bahin sang rehiyon bangud sa nagapadayon nga gyera.
