Na-trauma ang 12-anyos nga dalagita nga ginaalegar ginhimuslan sang 38-anyos nga tiyo sa banwa sang Dumarao.
Sa exclusive interview sang Bombo Radyo kay Alyas Inday, nakasaksi sa ginhimo nga kabastusan ni alyas John nga naluoy ini kay Alyas Maria bangud nagapalangurog ang bilog nga lawas sang biktima kag nagahibi samtang ginasugid sa iya ang paghimulos sa iya sang tiyo.
Nahibaluan nga antes ang insedente, nag-inum ang suspek sa balay sang witness kaupod ang amay sang biktima kag utod ni alyas Inday apang naubusan sila sang ilimnon kag luyag pa mag-inum ni alyas John.
Nagbakal ang suspek sang ilimnon kag gin-upod sini ang dalagita sakay sa iya motorsiklo.
Lipod sa ihibalo ni Alyas John nga nakita sila sang witness apang sang nadugayan antes makabalik ang duha, ginsunod sila ni alyas Inday sa diin nakita sini ang motorsiklo sa tulay.
Wala nagdugay nakabati si Alyas Inday sang nagahibi nga bata kag sang iya pangitaon nakita sini sa dalum sang tulay ang biktima nga ginahimuslan sang suspek.
Wala sini ginsugid sa amay sang biktima kag utod ang iya nasaksihan apang naghimo sang pamaagi agud pangitaon sang mga ini ang suspek nga naglisensiya nga mabakal sang dugang nga ilimnon.
Sang nagbalik ang suspek may dala na ini nga ilimnon kag nagpangita sang pamaagi si Alyas Inday para mausisa ang biktima nga nag-ako nga ginhimuslan ini sang tiyo.
Bangud diri, nagpangayo sang bulig si Inday sa barangay tanod nga amo ang nagdala sa ila sa police station.
