Gin-anunsyo sang Philippine National Police Anti-Cybercrime Group (PNP-ACG) nga 143 ka indibidwal ang nadakpan sa nagkalain-lain nga kaso sang cybercrime sa bug-os nga bulan sang Hulyo.
Suno kay Brigadier General Bernard Yang, direktor sang Anti-Cybercrime Group, 106 sa mga nadakpan ang nakuha paagi sa mga entrapment operations, samtang 37 naman ang mga wanted persons nga gin-aresto sa kabug-usan nga 143 ka anti-cybercrime operations.
Suno kay Yang, 18 ka indibidwal ang naluwas gikan sa cyber-related exploitation, kag walo ang na-convict bangud sang cybercrime-related nga mga kaso.
Dugang pa sini, kapin 126 ka cyber warrants nga ginduso, ini nagresulta sa 171 ka kaso nga na-file kag 84 ka inquest proceedings.
Sa bilog nga bulan sang Hulyo, naka-record man ang PNP-ACG sang 1,227 ka cyber patrolling ukon online monitoring kag 76 ka digital forensic examinations.
Katuyuan sini agud pabaskugon ang mga operasyon bilang pagsunod sa direktiba ni PNP Chief Gen. Nicolas Torre III nga pasangkaron ang cybercrime investigations kag himuon nga mas luwas ang digital nga kalibutan para sa tanan.
