TAPAZ, CAPIZ – Ginkalipay sang mga pumuluyo sa Barangay Tabon, Tapaz, Capiz ang pag-energize sang Capiz Electric Cooperative (CAPELCO) sa 150 ka mga kabalayan makaligad ang pila ka tuig nga pag hulat.
Sa interview sang Bombo Radyo kay Engr. Edgar Diaz General Manager sang Capelco, malayo ang nasambit nga barangay kay yara ini sa nabukid nga bahin kag indi makasulod ang mga salakyan, gani naglakat ang mga ini sang masobra 20 kilometros, apang kasubong nga nadula ang ila kakapoy sang na-energize na ang ila kuryente kag nakita ang kalipay sang mga pumuluyo.
Suno kay Diaz, yara pa sa 15 ka mga barangay ang wala sang kuryente sa mga upland barangay sa Tapaz kag ang mayor nga problema amo ang dalan nga indi makasulod ang mga salakyan.
Nagalaum naman ini nga sa programa sang LGU Tapaz kag sa suporta sang ila talatapan, matigayon nga malab-ot kag mapasiga ang nabilin nga mga barangay.
Samtang, wala naman sang pagalauman nga black out sa petsa 24, 25 kag 31 sang Disyembre kag sa una nga adlaw sang Enero sa tagsa ka mga kabanwahanan bangud may ara na sang ginbutang nga maintenance crew agud gilayon nga mabalik ang kuryente.
