ROXAS CITY – Ginkompirmar sang Roxas City Locally Stranded Individual’s Coordinator nga may yara sang kapin 150 ka mga locally stranded individuals ang natalana nga magpauli sa probinsiya gikan sa Metro Manila.
Ini ang ginkompirmar ni Roxas City LSI’s Coordinator Abe Ballos sang mainterview sang Bombo Radyo.
Ginpahayag ni Ballos nga ginalauman nga sa maabot nga dominggo nga adlaw ang barko sang 2GO travel sakay ang mga locally stranded individuals kabahin sang ikaduha nga mercy voyage nga ginpatigayon sang city government.
Suno kay Ballos ginbulunbanta nga kapin 150 ka mga LSIs ang sakay sang barko sa diin 121 diri ang mga residente sang Roxas City samtang 30 naman ang mga nagapalauli sa mga kabanwahanan.
Gin-athag ni Ballos nga wala pa ginapangitaan sang RT-PCR test result ang mga nagapalauli nga mga LSIs sa baylo medical certificate kag authority to travel gid lamang ang kinahanglan nga iprisentar sang mga LSIs.
Gin-athag man ni Ballos nga libre kag wala bayad ang pagsakay sang mga LSIs sa barko nga ila pagasakyan pabalik sa probinsiya.
Ginpasiguro ni Ballos nga ipadalum sa Rapid testing kag ipaidalum sa strict quarantine ang mga LSIs nga magapauli sa probinsiya.
