ROXAS CITY – Nakaparehistro na ang 152 nga mga Persons Deprived of Liberty (PDL’s) nga yara sa Bureau of Jail Management and Penology (BJMP) nga nahamtang sa Barangay San Jose, Roxas City.
Sa interview sang Bombo Radyo kay JSINSP. Rodel Morales Warden sang BJMP San Jose Roxas City, ginpahayag sini nga ang nasambit nga numero ang kwalipikado na sa pagboto para sa palaabuton nga Barangay kag Sangguniang Kabataan Eleksyon (BSKE).
Suno kay Morales, may yara na sa karun nga 300 nga mga PDL’s nga kalalakinhan ang nasambit nga presohan kung sa diin may yara sang 10 ka mga selda kag nagaunod ini sang masobra 20 ka mga preso depende sa kadakuon sini.
Mahibaluan nga ang 300 nga numero ang sobra sa congestion rate sa idalum sang united nation standard.
Ginpahanumdum man sang amu nga Warden nga hugot nila nga ginadumilian nga magsulod kag magpanghatag ang mga kandidato sa mga preso.
Apang pananglitan suno diri nga luyag nila nga magkampanya, may yara sila sang mga requirements nga kinahanglan i-comply antes matigayon nga makakampanya.
Samtang, ginklaro man ni Morales nga sa adlaw mismo sang pagpiniliay magaboto ang mga preso kag mismo man sa BJMP San Jose sila magapatigayon.
