ROXAS CITY – Naglab-ot sa 1,531 ka mga miyembro kag supporters sang Communist Party of the Philippines-New People’s Army-National Democratic Front (CPP-NPA-NDF) ang nagsurrender kag nagbalik sa sabak sang gobyerno, sang 2021.
Ini ang ginpahayag ni Capt. Kim Apitong, spokesperson sang 3rd Infantry Division sang Philippine Army, sang mainterview sang Bombo Radyo.
Suno diri, sa nasambit nga numero, 44 diri ang regular nga miyembro sang NPA; 159 ang ginatawag ‘Militia ng Bayan’ (MB) kun sa diin, ini ang mga masiling ‘Sibilyan sa umaga, NPA sa gabi’; 143 naman ang mga miyembro sang Sangay ng Partido sa Lokalidad (SPL); kag 1,185 ang mga ginalakipan sang Underground Mass Organization (UGMO) ukon ang mga nagapartisipar sa mga rallies para sa kabataan ukon kababainhan, nga kontrolado sang NPA.
May yara man sang 120 ka high-powered kag low-powered nga armas-luthang ang nasurrender sang NPA kag supporters sa militar.
Natigayon man nga mapa-enrol sa programa sang gobyerno para sa tayuyon nga pagbag-o ang pila ka mga surrenderees.
Nagpasalamat man si Apitong sa effort sang gobyerno agud mapaintindi sa mga rebelde nga grupo nga magbalik sa sabak sang gobyerno kag matuldukan ang insurhensiya sa Panay Island kag sa pungsod Pilipinas.
