ROXAS CITY — Nag-alegar ang isa ka 15-anyos nga dalagita nga gin-molestiya siya sang isa ka negosyante nga bana sang babaye nga alegar nagsakit man sa iya sa sulod sang salakyan sadtong nagligad nga Marso 7.
Suno sa biktima nga si alyas Ayi, Oktubre 2016 sang una sila nga nagtabuay sang negosyante nga suspek sa Dinggoy Roxas Civic Center matapos nga nakursonadahan ini sang negosyante nga masami nagapangape sa ila ginapanag-iyahan nga kapehan sa Barangay Libas sining siyudad.
Ginpatpat sang biktima nga didto kag nagtuad sa iya sang paghigugma ang negosyante, apang suno sa dalagita nga wala niya ini ginbaton.
Suno pa sa dalagita nga ginaginanyat siya sang negosyante nga ihatag diri ang iya pagkababaye sa balor nga singko-mil pesos, apang nagapamalibad sa gihapon ini.
Aminado si Ayi nga ginahatag-hatagan man siya sang kwarta sang suspek sa tion nga sila ang magkit-anay kag alegar nga ginahalukan kag ginahurikap man siya sini sa mga pribado nga parte sang iya nga lawas.
Ulihi sila nga nagkitaay sang negosyante sang Marso 7 man nga adlaw kun sa diin alegar nga gindala siya sang negosyante sa isa ka hotel sa Barangay Cagay kag tuyo kuntani nga angkunon ang iya nga pagkababaye, apang wala ini matabo bangud yara sadto ang pamulanon sang dalagita.
Mahibaluan nga sang amo man nga adlaw, ginhagad sang tinawo sang asawa sang negosyante ang dalagita nga magsakay sa isa ka salakyan kun sa diin adto man didto sa sulod ang asawa sang negosyante.
Didto kag alegar nga ginsakit sang ginang ang dalagita samtang iya ini nga ginapasikto kun may natabo sa ila nga duha sang iya bana.
