ROXAS CITY – Pilason ang menor de edad nga lalaki matapos ginluthang sa Urban Bankiling, Brgy. Milibili, Roxas City.
Ang wala na ginhingadlan nga lalaki ang nagapang-edaron sang 16-anyos kag residente sang nasambit nga barangay.
Sa impormasyon nagikan sa Roxas City PNP, nga samtang nagakatulog sa terrace ang menor de edad sa balay sang iya amo nga negosyante kun sa diin siya nagatrabaho bilang helper sang hinali nalang ini ginluthang.
Ginkakibot ini sang iya amo nga yara man sa nasambit nga puluy-an bangud naigo sang bala ang glass window sang iya balay.
Nakit-an sini ang biktima nga duguon kag may igo sang bala sa natuo nga bahin sang kamot kag gilayon nga ginpadangat sa pribado ospital.
Suno sa isa ka residente nga yara sa lugar, takna alas-2 kaina sang magaaga sang mapadulong siya kuntani sa merkado sang nakita niya ang isa ka persona nga nagasuksok sang hoodie jacket kag may kaupod ini nga isa pa ka lalaki nga nagahulat naman sa motorsiklo.
Ginapahayag nag-agi ang suspetsado sa kudal kag didto ginluthang ang biktima.
Ginahibalo pa sa karon sang kapulisan ang motibo kag pagkakilanlan sang mga suspetsado.
