ROXAS CITY – Ginkumpirmar ni Punong Barangay Erwin Oroceo nga nagikan sa Balud Masbate ang 16 tanan ka mga baboy nga tuyo kun tani pasudlon sa syudad sang Roxas kahapon takna alas 9:00 sang aga.
Sa interview sang Bombo Radyo kay Oroceo, ginpahayag sini nga sa nasambit nga oras nagpabalhag ang pila ka mga residente sang Barangay Baybay nga may yara sang mga baboy nga ginpapanaog sa baruto kag ginkarga na sa tatlo ka mga tricycle agud kun tani maglakat.
Bangud sini, gilayon niya nga ginmanduan ang mga Barangay Tanod nga padulungan ang nasambit nga lugar agud kumpirmahon nga matuod ang ginapanghambal sang mga pumuluyo.
Ginapahayag nga sang ginpangayuan na sang mga dokumento ang mga indibidwal nga nagdala sang baboy, napaslawan sila nga magpakita sini apang hugot pa suno diri nila nga ginapilit nga may yara sila sang paghinun-anun sa opisyales sang Barangay Baybay kun sa diin nagapahanugot suno diri nga magpasulod sang baboy.
Sa ila pa nga pagpangusisa ginsiling man nga may yara na sila sang 4 ka mga buyer nga taga syudad sang Roxas kag may yara sila sang permit apang wala nila ini ginapakita sa mga barangay opisyal.
Bangud sini, nakighinun-anon si Oroceo sa City Veterinarian Office kun anu ang mahimo sini nga tikang kag didto nadesisyunan nga ipabalik na lamang ang mga baboy sa Balud Masbate antes mag-alas 5:00 sang hapon bangud kung magpakatig-a pa ang mga ini mapilitan sila nga sunugon na lamang ang mga baboy.
Samtang, nagpalab-ot naman sang pagpasalamat ang nasambit nga kapitan sa mga pumuluyo sang Barangay Baybay bangud sa kooperasyon kag konsiderasyon sa ila lugar.
Mensahe sini sa mga nagatuyo pa nga magpasulod sang mga baboy sa lugar, indi na kun tani pa magpasuway kag sundon na lamang kun anu ang mandato sang gobyerno probinsyal bangud para man ini sa kaluwasan sang tanan.
