ROXAS CITY – Patay ang 18-anyos nga lalaki matapos nga bumunggo ang ginamaneho nga motorsiklo sa isa ka multicab sa Brgy. Anhawon, Panay, Capiz, las-10:43 kagab-i, Disyembre 31, 2021.
Ginkilala ang napatay kay Adrian Anoche, sang Barangay Bahit, sa amu man nga banwa.
Sandig sa inisyal nga imbestigasyon sang mga katapo sang Panay MPS, samtang ginasubay ni Arnel Buencuchillo, 29-anyos kag residente sang Barangay Bato, driver sang Suzuki Multicab Pick-up nga nagikan sa syudad sang Roxas kag magapaliko sa MN Builders Realty, sa hinali nga bumunggo ang kasunod sini nga raider 150 nga ginamaneho ni Anoche.
Bangud sa impact sang pagkabunggo, nag-angkon sang patal nga pilas sa magkatuhay nga parte sang lawas ang driver sang motorsiklo nga gilayon ginpadangat sang mga katapo sang Panay Emergency Response Team sa pinakamalapit nga ospital, apang gindeklarar nga Dead on arrival sang doktor sa The Health Centrum, las-11:15.
Ginapahayag nga madasig ang pagpadalagan sang driver sang motorsiklo.
Sa karon, ginkustodiya sa Panay MPS ang driver sang multicab kag ang duha ka mga imbulbado nga salakyan para sa nagakaigo nga disposisyon.
