Ginpasakaan na sang kaso sang National Bureau of Investigation (NBI) ang 18 ka mga dumuluong nga una na nga naaresto sa Parañaque City bangud sa ginapahayag online scam.
Matandaan una na nga nadakpan sang mga otoridad ang 8 sa mga ini sadtong Enero, 14, 2025 matapos maserbihan sang search warrant.
Ginkilala ang mga nadakpan nga sanday Xiao Li, Chuan Zi Gao, Ming Ru Li, Wen Shu Liu, Qui Shun Li, Cai Li Pan, Changfu Liu kag Zhang Zhen Hong.
Sa sunod nga operasyon Enero 15, natigayon naman nga maaresto ang pito kag iban pa nga Vietnamese kag tatlo ka mga Chinese.
Suno kay NBI Director Jaime Santiago, ang nangin madinalag-on nga pagka-aresto sa mga dumuluong pinaagi sa mga nabaton nga intelligence report may kaangtanan sa pagkaulamid sang mga ini sa investment fraud, cryptocurrency scam, romance scam, identity theft kag digital communication schemes.
Ang nasambit nga mga indibidwal lunsay ginpasakaan sang kaso nga mga Anti-Financial Account Scamming Law, kag Cybercrime Prevention Act.
Sa karun, isa pa ka Chinese ang padayon nga ginaayam sang mga otoridad.
