ROXAS CITY – Magapasakup sa Palarong Pambansa 2023 nga pagahiwaton sa Marikina, Metro Manila ang 19 tanan ka mga Capiznon Athletes bilang tiglawas sang Western Visayas.
Ini ang ginpahayag ni Mr. Ronnie Reteracion, DepEd-Capiz Sports Coordinator sang mainterview sang Bombo Radyo.
Suno diri, ang 19 ka mga athletes ang ginakabug-usan sang elementary kag high school students sa nagkalain-lain nga sports kasubong sang table tennis, swimming, taekwondo, pencak silat kag chess.
Magapadulong ang mga delegado sang Capiz sa Marikina para sa 1 ka semana nga hampang humalin Hulyo 29 tubtob Agosto 5, sini nga tuig.
Pahayag sini, nga mas madamo subong nga delegado ang Capiz kumparar sang nanliligad nga tuig bangud sa nabag-o nga qualification sang Palarong Pambansa.
Sa dati nga qualification standard, kun makakuha sang bulawan nga medalya otomatiko nga mapasakup sa Palarong Pambansa apang subong nga revision apisar silver medal lang ang makuha kag malab-ot ang qualifying points, direkta na ini sa nasyunal nga hampang.
Tuman naman ang pagpasalamat ni Reteracion, sa gobyerno probinsyal sa wala untat nga pagsuporta sa mga batang atleta kag ginasiguro sini nga magahatag sang bugal kag kadalag-an para sa probinsya.
