ROXAS CITY – Nagdangat sa 19 ang narekord nga nagkalamatay samtang 1 ang padayon nga “missing” bangud sa pagpanalasa sang bagyong Agaton, sa probinsya sang Capiz sang nagligad nga semana.
Ini ang ginkumpirmar ni Governor Esteban Evan Contreras, sang mainterview sang Bombo Radyo.
Suno diri, ini ang mga nagikan sa mga kabanwahanan kag mga pangalan sang mga biktima:
Roxas City – 1 (Edgar Villareal sang Brgy. Bolo apang nasapwan sa Salocon, Panit-an)
Panay – 3 – (Juan Bulaclac sa Cabugao Oeste, Melvin Bulao-na-trap sa ila pinsa sa Brgy. Lus-onan kag Melvin Bunda nga naanod sa Brgy. Buntod)
Panit-an – 5 (Stephen Besa sa Salocon kag 4 ka sakay sa naubon nga baroto-Dominador Drilon, Jhelo Daliva, Syriel Degoma, Bianito Denosta)
Pontevedra – 2 (Richard Villasis sang Brgy. Guba kag Nita Villariña sang Ameligan)
Maayon – 3 – (mag-utod nga Joselito kag Monito Dequino kag Tammy Luces sang Brgy. Tuburan)
Mambusao – 1 – (Alexander Andrade, Brgy. Caidquid)
Pilar – 1 – (Rodolfo ‘Jeffrey’ Bacolod sang Brgy. Dulangan)
Sigma – 3 – (Francis Lozora Jore, Brgy. Guintas, Fernando Carillo, Pob. Sur, kag alyas Paolo nga 17-anyos)
Padayon man nga ‘missing’ ang isa sa mga sakay sang naubon nga baroto sa Poblacion Ilawod, banwa sang Panit-an nga si Alberto Duron.
Sa karon, padayon ang paglibot sang gobernador sa probinsya agud magpalab-ot sang bulig sa mga residente.
Ginpahayag man sini nga ba-se sa datos, may yara nga P176 million ang kahalitan sa agrikultura, sang nagpanalasa ang bagyo sa probinsya.
Sa pihak nga bahin, nagalaum ini nga maaprubahan na sang Sangguniang Panlalawigan ang hinyo sini nga ipaidalom sa State of Calamity ang bug-os nga Capiz agud magamit sang mga LGU ang ila calamity fund para sa mga naapektuhan sang bagyo.
Dako man ang iya pagpasalamat kay Presidente Rodrigo Duterte nga nagpromisa nga magabulig sa Capiz.
