ROXAS CITY – Madinalag-on nga ginpatigayon kahapon nga adlaw, Hunyo 25, ang pagsugod sang 1M kahoy project sang Provincial government pinaagi sa Capiz Provincial Environment and Natural Resources Office (CaPENRO) kadungan sang Provincial Arbor Day.
Sa karon nga tuig, ginpatigayon ini Camp Escutin, Barangay Matagnop, banwa sang Dao kag sa Barangay Agojo, sa banwa sang Panay.
Sa interview sang Bombo Radyo kay Mr. Wilmon Alinsangan, Information Communication Education Section Head sang CaPENRO, ginpahayag sini nga tinutuyo sini nga proyekto amu ang makatanom sang madamo nga kahoy sa probinsya para sa Greener Capiz.
Maga-pokus man sila sa subong nga tuig sa pagtanom sang kahoy sa upland kag coastal barangays kaangay sa Maayon, President Roxas, Cuartero, Dao kag iban pa, agud makabulig likaw sa tion sang mga kalamidad nga nagaabot sa probinsya.
Mataas man suno diri ang survival rate sang mga ginpangtanom nga kahoy sang 2018 kag 2019.
Sa pagkamatuod, nagapamunga na ang pila ka fruit-bearing trees nga ginpangtanum sa kilid sang Villareal Stadium.
Nakatanom sang 1,750 ka native kag fruit bearing trees sa Dao, samtang 1,200 seedling sang beach forest trees kag mangroves ang natanom sa Panay.
Ginpangunahan ang aktibidad ni outgoing Governor Esteban Evan Contreras nga nagalaum nga magapadayon ini nga proyekto, mga volunteers, kag participants sa nagkalain-lain nga organisasyon, ahensya sa gobyerno, NGO’s, Youth organization, academes kag local government units.
Ginaganyat man sang ahensya ang mga pumuluyo nga magtanom sang puno sang kahoy sa ila lugar.
