Makabig nga fair and just ang nangin desisyon sang mga katapu sang Sangguniang Panlungsod angut sa anum ka bulan nga suspension ni Kapitan Einstein Okpora sang Barangay Inzo Arnaldo Village, sining syudad.
Ginpahayag ni 1st kagawad Ervin Sicad, ang magapungko nga punong barangay sang Barangay Inzo Arnaldo Village tal-us kay Kapitan Einstein Okpora nga isa ini ka maayo nga development sa konseho bangud maswelduhan na sila tanan nga mga nagtrabaho sa ila barangay matapos ang isa ka tuig.
Ginpasalig man sini nga lakip sa makabaton sang sweldo si Okpora bangud nagserbisyo man ini.
Ginkumpirma man ni Sicad nga kasunod sa iya nga pagpungko bilang punong barangay ang pag-appoint sang treasurer sa pagkatawo ni Elma Borlado.
Nahibaluan nga nagserbe na sadto sa amo nga posisyon si Borlado, apang ginaalegar nga ginpahalin ni Okpora matapos na-obserbahan nga nangin malapit na ini sa mga kagawad sang barangay sa diin may konflikto ang magtimbang nga bahin.
Mangin prayoridad man nga bayaran sang barangay kun mahitso na ang tanan amo ang ila water kag electric bill matapos gin-utdan bangud sa kapaslawan nga mabayaran ang nasambit nga mga bills.
Samtang magapatawag ini sang sesyon sa weekend para matalakay sang konseho ang pila ka mga bagay kasunod sang suspension ni Okpora.
Nahibaluan nga madugay na nga wala nakapatigayon sang session ang barangay council bangud wala sang sesyon sadto nga wala sila nagaupas, rason nga nadesisyunan nga ipaiway anay ang sesyon.
Apang sa pihak nga wala sang nagakahinabo nga sesyon sa ila barangay, kada isa sa ila ang naga-function santu sa ila nga trabaho.
