Gin-aprubahan sang US Senate ang isa ka hagna nga maga-alokar sang $2.5 billion nga bulig sa seguridad para sa Pilipinas.
Ang hagna, nga ginatawag Philippines Enhanced Resilience Act (PERA Act), nga ginpakilala nanday Senador Bill Hagerty kag Tim Kaine, magatugot sang tubtob $500 milyon nga Foreign Military Financing (FMF) grant assistance sa Pilipinas halin 2026 tubtob 2030, ukon kabug-usan nga $2.5 bilyon sa sulod sang lima ka tuig.
Tinutuyo sang hagna nga mas padalumon pa gid ang kooperasyon sa depensa sa tunga sang US kag Pilipinas kag mapabaskog ang defense capabilities kag interoperability sang alyansa sang duha ka pungsod agud masabat ang nagadaku nga pamahog sa Indo-Pacific Region.
Gin-anunsyo man ni Philippine Ambassador to Washington Jose Manuel Romualdez nga ini ang pinakadaku nga defense assistance package gikan sa US para sa Pilipinas, ang pinakamalawig sini nga kaalyado sa Asya.
Samtang, ang nasambit nga hagna ang ipadala na sa talatapan ni US President Donald Trump agud pirmahan nga mangin isa na ka layi.
