Ginpakigbahin ni Pagasa Administrator Nathaniel Servando nga duha ka bagyo nga yara sa karon sa sulod sang Philippine area of responsibility (PAR) ang naga-interact.
Lakip diri ang tropical storm Dante kag tropical depression Emong.
Ginpahayag ni Servando sa Bombo Radyo nga bangud mas nagapangibabaw ang bagyo Dante, nagaganyat ini sa paghulag sang ‘Emong.’
Ginabutong kuno ini padulong sa direksyon sang Eastern Taiwan.
Apang antes magdiretso sa Taiwan, magalibot anay ini sa Ilocos Region antes magdalagan paibabaw.
Ang Fujiwara effect isa ka termino nga ginagamit sa paglaragway sang pag-angot sang duha ka nagapalapit nga sistema sang panahon.
Ginkuha ini sa ngalan ni Dr. Sakuhei Fujiwhara, isa ka Japanese meteorologist nga una nga naglaragway sang hitabo sang 1921.
Sa iya pagtuon sa paghulag sang mga vortices sa tubig, natalupangdan niya ang isa ka makatilingala nga pag-angot sa ulot sang duha ka bagyo ukon mga sistema sang bagyo kon sila malapit sa isa kag isa.
Kon matabo ini, ang duha ka bagyo nagalibot sa isa ka sentro nga punto, nga daw nagasaot sa kahanginan.
Mahimo ini magresulta sa pagtuyok, pagpalapit, ukon pagtingob sang duha ka sistema sang bagyo.