ROXAS CITY – Ginkumpirmar sang Punong Brgy. Sang Jaena Norte nga may mga records na ang 2 ka mag-utod nga ginluthang sa nasambit nga brgy. sa banwa sang Jamindan.
Suno kay Punong Brgy. Simpasico Vera, Kapitan sang Jaena Norte, ginpahayag sini nga may mga records na ang mag-utod sang pagpangawat sa ila brgy. kag makapila na ini ka beses nga ginpatawag sang brgy. kaupod ang ila ginikanan.
Apang suno sa iloy, wala na ini siya sang may mahimo kay wala man ang mga ini nahadlok, dugang pa niya nga bahala na kun ano man ang matabo sa iya bata bangud wala man ang mga ini nagapati sa iya.
Dugang pa ni Kap Vera, nga indi madali mahatagan sang nagakaigo nga disposisyon sang brgy. ang mag-utod bangud menor de edad pa lamang sila.
Matandaan nga ang mga nagkalapilasan nga mag-utod amu sanday Louie Eleuterio, 21-anyos kag ang iya 14- anyos nga wala na ginhingadlan nga manghod.
Matandaan ginpangluthang sila ni Roy Glorian Danid residente sang nasambit nga barangay bangud ginapasibangdan sini nga ginwasak kag ginkawat sang mag-utod ang iya maisan.
Nahibaluan nga nagsungka ang suspetsado kay punong Brgy. Vera kag gilayon man nga ginturn-over sa kapulisan.
Sa karon, nakahunong ang suspek sa karsel sang Jamindan MPS samtang padayon nga ginabulong sa RMPH ang 2 ka biktima.
